مونولـــــوج
اليوم الجو جميل ... بدايه الخريف.. صفره اوراق اشجاره المنثوره تثير كل الامانى ....والاحلام بعطرها ودفئها الحانى كانها الجنه مفروشه ذهبا
اول لقاء بينهما تزامن مع كل هذا الجمال ... سيمفونيه رائعه ابت الا ان تكتمل ...بهما
منذ اسبوع مضى او ربما منذما ولدت وهى تتهيأ لهذا اللقاء تتخيل انها اختارت ان تخلق كانثى لهذا الموعد فقط ...له
نثرت محتويات خزانتها ،انتقت ،ترددت،خلعت ولبست عشرات المرات ،تنثر مع ملابسها كل مشاعرها الحبيسه وعشقها ونورها لتنتقى منها اجمل وارق مابها ...
لا ده طويل بزياده ،ده غامق اوى ، ده مبين صدرى ،شعرى كده مش حلو ،هاسيبه ، لاهارفعه احسن،الحلق ده كبير ، وده مش باين الجزمه افتح من الشنطه ، يوووووه
البيت عاوز يترتب ، الاوضه مضلمه كده ليه ؟ لازم اشترى ورد ، ايه اللخبطه دى ...؟!
هو ابدا لن يزورها ببيتها ، لكن هناك ما يدعوها لترتيب عالمها كله ... ترتب منزلها وتجمله وفى نفس الوقت ترتب نفسها وتجملها وتضيئها وتضع الورود فى قوارير قلبها....
حمل ثقيل ، كيف لها ان ترتب كل هذا؟!
حان وقت اللقاء....تسارعت دقات قلبها....وبردت اطرافها، رغم انها لم تخطو بعد ايه خطوه خارج اعتاب باب بيتها
مائه سيناريو ، وضعت كلا منها بأحتراف ...متضمنا ...اللفتات ...النظرات حتى زوايا الاضاءه.... تخيلتها
الميعاد فى السابعه.... نزلت الى سيارتها فى الخامسه ،السماء صافيه ادارت الكاسيت اغنيه لا تمل منها وكانها هرمونا يحفزها وينشطها للقاء، تتلذذ بها كقطعه سكر ... تذوب فى فم محروم، فتنفذ اليه كل قطره ...لتشبع الدم والعقل ....وتعلو بالروح فى نشوه الاكتفاء.... والرضا
لا تدرى كيف وصل الى المقعد المجاور لها ...احمرت ...ونفرت دماءها
ازييك ؟
الحمد لله ، انت عامل ايه؟
انا كويس ....مالك محلويه النهارده كده ليه!
بجد ..؟! تسعد بتعليقه ... ويكمل عقلها الجمله تلو الاخرى دون توقف ....ولا يجرؤ لسانها على الرد
شيك اوى الطقم ده ،جديد؟
لا انا لبسته قبل كده
لا ما لبستيهوش معايا قبل كده ،أه افتكرت...انا فعلا شفتك بيه مره...بس بجد حلو عليكى
ماذا يقصد بمش معايا ... ليته يفهم انه لابد ان يحذر من ان يتكلم معى بهذه الطريقه ...فانا لم اعد احتمل التاويل والتفسير
ميرسى على المجامله
انا مش باجاملك دى حقيقه انتى ما شفتيش نفسك النهارده؟ وضع يده على يدها...سلمتها له دون اعتراض... مشتاقه هى لهذا العناق الشفوى ...لم تمنعها اسوارها ولا حصونها .. ومادام قد نفذ من السور ...فلا مانع من الخلاص...
عطش... وظمأ يشق روحها أرادت ان ترتوى حقها وهاهى الميا ه وفيره ... فلتنهل...
انت وحشتنى اوى ..
قالتها دون تفكير...ارادت ان تردها لحلقها... لم تفلح...وكانما فتحت لمسه اصابعه تلك كل ابوابها ..
ليت الطريق لاينتهى ....ليت الحياه تستمر مع دوران عجلات هذه السياره سفرا.. معه... وحده ، نعم انه هو ، هو...
وانتى كمان ....هاه ... عملتى ايه النهارده ؟
لم يعطها ايه فرصه للاجابه ...وضع يده على ركبتها ، ضغط عليها برفق وارتفعت يده قليلا بميزان لا يجرحها ، لم تكن جراءه منه ،لم تشعر سوى بانه اراد فقط ان يتاكد من وجودها الى جانبه لم تشعر به يفترسها ، لم تشعر منه ذلك الشره الذكورى ، شعرت به مادا يده اليها متشبثا بها كى لاتفلت ... ليؤكد لنفسه انها حقيقه بين يديه...وربما ليؤكد لها هى انها فعلا اصبحت بين يديه
فرصه انا كمان ممكن المسه....
ربتت بيدها على خده
تركته يفعل بقلبها وعقلها ما يريد ....
رفع يده عنها بهدؤ وكانما هو الاخر ارتوى من لمستها تلك ، سحب يدها ...قبل باطن كفها ..اعاد كفها الى وجهه مره اخرى
ذابت تماما ....
لم تطمع ولم يطمع ، لم يتجاوز ابدا الحدود ،ابدا ، ولا هى ارادته ان يتجاوزها .... مكتفيه هى تماما منه بما جاد به عليها.
اتفاق غير معلن ... فلا هو خرق العقد ولا هى تمنت.
انتهى اللقاء...شيعته نظراتها آبيه ان يخبو ظله من عينيها
شردت لثانيه ...ظنت نفسها تهلوس ... تحسست مكانه، قربت انفها من المقعد ... تنفست رائحه جسده ....
لا لم افقد عقلى بعد ....لقد كان هنا...معى
صعدت الدرج بخفه ، رغم وجود مصعد ، ادارت المفتاح و دخلت الى شرنقتها .
البيت مضىء وهادىء ....
لم تلقى حقيبتها ولا ملابسها بل رتبت كل شى فى مكانه تماما.
وقفت امام المرآه ... تنظر الى وجهها وجسدها ...تتلفت لترى ظهرها ، تمنت لو انها استطاعت ان ترى نفسها بعينيه
ترى كيف يرانى ؟
فى كل مره تفرحها كلماته او تعليقاته و حتى بعد ان تزيل زينتها ترى نفسها احلى وارشق واصبى .
رفعت سماعه الهاتف:
تصبح على خير ..
وانتى من اهله !!
اغلقت السماعه برفق .....واسندت راسها على وسادتها ... اخرجت اوراقها التى كتبتها منذ زمن لتقرأ ما كتبته له... وعنه، لتقرأ كيف كان فى حياتها حلما طاف بها ومر مرورا احياها ...
ادارت اغنيه جميله لمروان خورى قصر الشوق ... نصحها ان تشترى البومه ... ظنت أنه يقصدها هى بتلك الاغنيه ....
ادمنتها حتى انها اعادت تسجيلها اكثر من مره..... سمت الالبوم باسمه ، وبدأت باول صفحه
ترى، هل تصلك كل نبضاتى المسجونه بداخلى ،اتعلم ام لا تعلم؟
اظنك حينا مدركا ...فاخاف ...واخرى لاهيا عنى ... فاخاف ...
اراك ترانى احيانا..... واخرى اختفى
افسر كلماتك ...ارى اهتماما ،لا ليس الى هذه الدرجه ...اعتبرها انا راحه .... ترتاح الى .
اكثر من مره اكون انا اخر ماتراه وتكون انت ايضا اخر ما تراه عيناى....تحليه اخر اليوم ... هكذا اراك واتمنى ان اكون لك كذلك اعلم ان يومك طويل جدا .... مُهلك....
مغروره انا انى شبهت نفسى بقطعه الحلوى تلك ...ممكن !
سعيده بان ارى نفسى هكذا حتى وان كنت اضللها... ولكنى لم ابخسك ابدا حقك حين اعتبرتك .... تحليتى انا ...
لا اشبع منك ابدا ولا من النظر اليك ....وان كنت لا اضع عينى فى عينيك ابدا
قاعد اخطط اكتب وامسح........... ارسم ادور على معنى القول
طاب يا لسانى ماتنطق انت ولامقدر على صوتك باب مقفول
قلمى يا فارس طايح فى السطر وكانه ميدان
حر وفاير .........تقدرتصرخ .........تقدر تضحك ........تقدر تقلع من غير حتى ملام
والحبر اهو ستاره شفافه منها بيبان........
كلامى المدفون جوايا واللى باقوله فى مجلس اكفان...
دى حلاوه روح ولا ده عجزك ؟
انطق يا جبان
يعجبنى شعورى بك فقط ،لا يهمنى هل تشعر بى ام لا ، ليس بمنطق انك غير هام ، اطلاقا ، ولكن يخيل الى انه لو وصلك ما اشعر به فقدتك وتهرب وربما افقد انا نفسى ، وانا لا اقو على اى من الفقدين...
يطربنى شعورى بك ،وتعجبنى اللعبه ،لعبه التمنى والانتظار،جميل هو ذلك الانتظار ....ممتع
تصدر منك اشارات قرب ،وماذا بعد؟.. انها طمأنه ليس الا ،واثبط نفسى ....عادى
تنزعج لانى غبت دون مبرر، تقلق على واسبب لك حيره أنا ،انا !!تلك كانت الدفعه القويه لهوه سحيقه من التاويل والتفسير وبدايه التوهه
احبااااااااااااااااااااااااااااط
ولكن ماذا تقول لظمآن ....يروى من بحر مالح... لايروى عطشا؟
تنزل عليه قطرات ندى عاديه تنزل كل صباح فيظنها من لهفه عليها له وحده....ولا يفطن ابدا انها تنزل عليه وعلى الارض والاشجار ...دون تفرقه ....مسكين!!
ينزل على ندى كلماتك.....واتشكك فى انه لى وحدى ...
وتعجبنى توهتى
اتبدأ صباحك بى أم انا من تبدأ صباحها بك؟ .....بشوش انت رغم انى لا افهمك....
ولا يهمك....صباح الفل !
الطريق الى بيتك طويل.... منحدر تحفه الاشجار من الجانبين...اسير فيه انا واخريات ...المنزل جميل ابيض يقف وحده اخر الطريق ..
صعدنا ...الباب مفتوح ...دخلنا.
خرجت امرأه لم اهتم بان اعرف من هى ،قابلتنا بتافف.
جلسنا دونك على اريكه تتوسط المنزل ،وانا وسطهم منكمشه اكاد لا يلمحنى احد ، اتيت متاخرا مسرعا ومعتذرا كالعاده.
تكلمت معك تلك المرأه بعصبيه ...حاولت ان تاخذها لحجره مجاوره لتهدئها ....سمعت الاخريات صوتها وانصرفن وبقيت انا وحدى لاادرى ماذا افعل ... شعرت بالذنب انى سببت لك هذا الازعاج وانى كنت سببا فى حدوث مشكله ولم اعرف كيف اتصرف .
انتى لسه هنا ... ؟
نظرت انت اليها وقلت :
حرام عليكى ليه كده ؟
لم ارد عليها ولا تكلمت ..اصبح كل همى الا اراها تعاملك بهذه الطريقه .....انسحبت بمنتهى الهدوء... حتى انك لم تلحظ انسحابى هذا....كنت مشغولا باسكاتها.
غيرت ملابسك فى عجل نزلت خلفى مسرعا ،سمعتها تسبك ،لم تعرها انتباه ولكنك زجرتها بنظره مؤلمه ...جدا ،اسرعت فى خطاى ،الطريق امامى صاعد ومهلك ورغم ذلك كنت اسير فيه بخطى سريعه حتى لا ترانى او تلحق بى
ناديتنى :
ماجده .....ماجده
لم اتوقف ،جئت انت من خلفى امسكت بيدى ،ظننتها امساكه عطف اواعتذار ، وابتسمت واجبت عن كلام لم تقله...
ابدا ما حصلش حاجه...
استدرت واصبح ظهرك مواجها لبيتك وضممتنى ، شعرت بانه لا يجب على ان اصدق ...واعتبرتها ضمه اشفاق على حالى ،كالعاده افسر واتشكك ...
مش عارف يعتذر لى ازاى عن اللى حصل
ضممتنى بقوه اكبر كانت يدى على طرف كتفك وراسى على صدرك...رغم اننا تقريبا فى ذات الحجم الا انى رايت نفسى وكانى تقلصت...اصبحت صغيره جدا ..
انا بحبك ..
يطمئننى ولا يريدنى ان احزن
قلتها ثانيه .... صدقتك ... امنت لك... تشبثت بك... واغمضت عينى ...وشعرت بشىء لا اعرف كيف اصفه...شىء لا يساوى الشعور به ولو للحظه العالم بما فيه.
ادرت راسك ولم تسمح لى بان افلت ،وبدل المرأه اصبحت هناك اثنتان تطلان علينا وتراقبانا فى حنق ،فجأه علا صوتك:
ايوه انا باحب ماجده ...
انتفضت من حلمى....اغمضت عينى بسرعه حتى اكمل الحلم ،لن تصدقنى ان قلت لك انى اكملته ، لم تتركنى .
انت يامن اخافك ويرعبنى وجودك احيانا فى داخلى ، واضع بيدى الحدود صارمه بيننا واؤنب نفسى واعذبها لانى سمحت لك بان تنفذ الى روحى نقطه نقطه ....انت فقط ...انت من احتوانى.
عارف.... صحيت الصبح مبتسمه.... فضل قلبى يدق واحساس الضمه ده جوايا كانه حقيقه ..اول مره فى حياتى اشوف فى الحلم راجل له وش ...احلامى كلها بناس من غير وشوش ....
اول مره حد ما يتكسف من وجودى ، اول مره حد ما يستخسر انه يدافع عنى ويواجه عشانى.
اول مره حد يخبينى جواه...و يحمينى ، عمرى ما حد اتعامل معايا كده.
مش عارفه ايه اللى بيجرى لى ده وللا القرصه اللى فى قلبى دى لازمتها ايه دلوقت ؟...يمكن من حلاوه الحلم وللا من استحاله تحقيقه فى الواقع وللا من ان اللى كان معايا هو انت
يمكن موجوعه لانى سمحت لروحى انى اروح لبعيد اوى كده خايفه حتى فى الحلم انى اتجاوز حدودى وانى اشوفك انت ، خايفه اصدق...غبيه...
الصبح صحيت جوايا بيغنى،السما زرقا والبحر كلام ،
خفت من الصوره دى قال لتاخدنى
لتطلع كدبه واطلع فى منام
زقيت روحى اوعى تروحى
نادى علىَّ...
اللون ده جميل مدى ايدك فيه
جواكى ثاير براكى حاير خايفه على ايه؟
اه على رايك...
اربط ايدى وشدنى جامد ،ياللا ما اجرب
وانا هاخسر ايه؟
حتى وان لم اجدك ،فانا سعيده بما فى داخلى... سعيده بسرى الصغير،لاول مره يكون لى سر .
تضحكنى تعليقاتك الغريبه حين اتذكرها ،اتعلم اكثر ما احبه فيك بخلاف يديك الناعمه واناملك الطويله.. ، والشعرات البيض الست القابعات على جانب راسك الايسر... احب صراحتك حين تتكلم
لا فيه حاجه بصراحه باكرهها ،الجاكيت الاخضر ،مميت ،ليه مش بتهتم ؟ الا هو انت عندك كام سنه ؟ مصيبه تطلع اصغر منى، اوعى تكون بخيل انا باكره البخل ..
شاغله روحى بايه بس؟!
الجو حلو اوى بس لازم انام بقى ولو انى عارفه هافضل الف فى السرير.
وجدت لى حجه كى استمع الى صوتك ،لن الوم نفسى ولن تشعر انت بانها حجه ...تعلمت منك كيف اصبح ماكره ..
انا قريت قصه جديده و حلوه اوى
مين باولو كويلهو؟
مش عارفه ايه اللى خلانى ارد الرد ده ... قرب صدره من المكتب وحط ايديه عليه
ايه ده عرفتى منين ؟ انتى قريتى له؟
اه 11 دقيقه ...
انتى قريبه منى اوى النهارده...غريبه!
طاب بالذمه ده كلام يتقال لواحده زييى ،يعنى انت مش عارف انى باتلكك؟
اعمل انا ايه بقى يعنى دلوقتى ؟
الرحمه ياربى.
بسمه وحلوه منوره وشى
وجوه فى عقلى كلامك ثابت
اه باتعمد اعيده وازيده
ساعه تلاقينى اقول انا جوه وساعه ترمينى بره بقوه
اضحك حبه واقول ايه يعنى
بره او جوه ،ده ما يمنعنى
لو مش لىَّ هاخده علىَّ
هاختار منه اللى عاجبنى...
واللى يقول لى ....ايوه قاصدنى
النهارده خرجت ،المكان حلو اوى بس النكد حط على كالعاده ، مش عارفه ايه اللى خلاك هجمت على افكارى فجاه كده وتخيلت لو انت كنت معايا ،لا انا معاك لانك dominant بشكل وحش .
كان نفسى تكون هنا !!
ابدا لم احتاج لا لشى ولا إلى احد ولكنى شعرت بانى احتاجك الى جانبى وآلمنى شعورى
نعم احتاج ...
احتاج ان احيا من جديد.....احتاج لكلمات تفرحنى وتغسلنى وتكون لى وحدى...احتاج لانسان يشعر بى كانسان وبانى لست كماله عدد او واحده ضمن...
احتاج لمن ينظر الى ولا يرى غيرى...اكفيه واكتفى به .
احتاج لمن يراقصنى ويخجلنى ويتكلم اولا يتكلم لايهم ، المهم هو ان اشعر انا بكلماته وبسكوته...ويقف مره واحده فى طريقى مصادفه او عمدا، يحادثنى متعللا باى شى.. يصارحنى بانه ما اتى الا ليرانى فقط ....اتى لى انا وحدى دون العالم...
احتاج لمن يهاتفنى فى عيد ميلادى ،فجأه ، كل سنه وانتى طيبه....
اعطيه فيسعد، ويعطينى هو دون ان استجدى عطاءه ...احتاج الى حضن دافىء ،امانا ،احتاج لمن يحتوينى ....يضغط على يدى دون قصد ارى بعيونه انه يشتاق الى ...يتخلى عن حصونه وينادينى بصوت لايفهمه غيرى.... يتهندم لى حين اواعده ويخطط الى اين سياخذنى...
ارى نفسى فى عيونه و يعرفنى كما انا فيقبلنى ...يقبل كل ادوارى
احتاج لمن امر عليه كخاطر فيبتسم ....واتذكر انا كلماته فابتسم...
اعطيه حياتى ومشاعرى وكلماتى وافكارى ونفسى كلها... اقف الى جواره واراه الافضل بين البشر جميعا....اضعه فى قلبى وروحى و انطق... اتكلم ..اعبر ....اخلع قيودى واتحرر.
احتاج رجلا يقدرنى ، يرانى حضنا، ،سندا ،حصنا ،مرسى...برا
احتاج الا اخفيك عن نفسى بعد الان...والا انكر وجودك الدائم بى
ادعى انى اكتفى بذاتى وانه لا ينقصنى احد .... حجه.
لانى ببساطه ...لا اجد رجلى انا.
عندى يقين بانه ما من استجابه .
اكره احتياجى اليك واكره عنادى ،واخرى استعذب هذا الاحتياج
يا ابنى انا نعمه صدقنى والله العظيم ،اللى زيى انقرضوا من زمان .
وفى سوق غاغه واقف وحدى، ايدى فى وسطى، خايف انادى عامل ابو مين..
قرشى فى جيبى عامله حبيبى ومتحفض بيه .
اخرس جامد عمره ماعاند ولا حتى نطق.
اضحك ساكت احزن ساكت ارميه ساكت .
ماترد يا اخينا ،ولا انت سهم الله عليك؟
دايخ على صوت.... طيب صدى صوت
مديت ايدى ...ونطت فكره ووقفت انادى بعلو الصوت
صحوبيه بقرش ولا جنيه.....مين له رغبه؟
حطوا لى شويه على قده يا دوب... أهو يخزوا العين
فى عينيا شرار، على دمع مرار...عامل جامد ...وعاوز اعاند
كبرى منعنى
وطلع منى ... غصبٍ عنى.... انين قطعنى .
ماتزيد حبه!
وبعدين بقى يعنى فيه ايه ؟
انا وقافله على روحى خالص وكدبت عليها وقلت خلاص انت بقيت بره وصدقت الكدبه
بجد وحشتينى ..... وحشنى الشغل معاكى
ممكن اعرف يعنى انا اتصرف ازاى ....... انت مجنون وللا انت فرحان انى شايفاك جوايا اوى كده..... ولا ايه بالضبط ...؟
كنت ناوياها والله اما تتنطط ما هتدخل تانى ...انا قفلت الباب خلاص... اعمل انا ايه بقى دلوقت...؟
جنابك راجع تخبط تانى جوايا.... وزى العيل الصغير ....... من غير استئذان حتى ...رحت داخل وقاعد ،وكانك عارف انه مكانك وانى ما شلت الكرسى بتاعك.... انا قومتك من عليه بس ...وانت رحت وجيت ودخلت عادى جدا .... لا وعايش حياتك جوايا تمام التمام ....ثقتك فى نفسك غريبه!
مش عارفه اقولها لك أزاى ...من فضلك راعينى شويه ...
أرحمنى حبه انت أيه؟!
أتفضل ادخل ...
مكانك موجود فى نفس الركن ...تحت أمرك...
وفتحت له الباب تانى.
شكلك قمر يخرب بيت كده ....النهارده كنت وهمى واخد teint ولابس chemise crème البنطلون الجينز كان حلو و الحزام levis زى الميداليه.
ياعم الشياكه بس،ما انت بتعرف تظبط اللبس اهه
شكلك مختلف يا نهاد صغرانه ومحلويه
من فضلك يعنى انا مش باعرف ارد اقولك ايه؟ اقولك لا ده انت اللى تجنن وللا اعمل ايه انا!
تعرف حاجه حلوه اوى ان الواحد تبقى عنده احلام .
وانتى تعرفى ايه عن احلامى؟
ولا حاجه
انتى وانا عندنا اكيد احلام مش يمكن ربنا يوم يحقق احلامنا
انتى وانا ......احلامنا...والنبى ده كلام !!
انا تفزعت منك بصراحه ،يانهار ابيض ايه اللى بيقوله ده...
لالالا هو ما يقصد ...انتى اتهبلتى وللا ايه ؟!...
اوضعت انت الحدود خوفا منى ؟! اوضعتها خوفا من ان تقع فى قلبى ولا تعرف لك مخرجا؟
أدفاعا وضعتها ام هربا....
ام انها موجوده اصلا وانا التى اتعامى عنها ؟.
لا يهم ، وساتظاهر بانه لا يهم....و لأقم حوارا مع نفسى
لم ابتعدت هكذا ؟ كنت تنير ايامى وكنت دائما اراك كنجمى المضىء هذا.
توهمت انا وجودى بداخلك لانجو احيانا ولاغرق كثيرا فيك
مهما يكن ،انا سعيده بوهمى واشكرك لانك اتحت لى الوهم فقد كنت افتقد الحلم
الجو جميل كان نفسى تبقى جنبى واحط راسى على كتفك وانااااااااااااااااااام الا لو حصل كده يا بنت المجانين!!!!! هتبقى حاجه وهميه....مش يمكن ؟ مين يعرف ؟
تصبح على خير بقى كفايه عليك كده النهارده...
نفسى ابطل خوف ...عاوزه اهدا وارتاح وأأمن
عارف ما فيه امان ولا راحه الا فى القبر ساعتها هتبان ياجنه يانار وكله هيعرف مكانه فين وتبقى خلصت بقى
وده ايه يا امه اللى فى ماجور ده هناك؟
ده توب ليكى راح الفك بيه
ما بلاش يا امه العجنه دى لا
اوعاك يا امه ده ايديكى ملانه غايصين جواه
والله يا بنتى غصب عنى ايدى وقعت فيه
بس يا بنتى يا ضنايا انت
قهرك منى مالى انا حيله فيه
ما اعرف غيره يستر عرضك وراح اخبيكى فيه!!
ياترى راح فين ...ياترى حصل ايه ؟
انا والله اتخضيت ،قلت اختفى فين ؟
لالا انا موجود بس كنت مشغول شويه
طاب الحمد لله انا قلقت يكون بعد الشر حصل شى ، مش الحمد لله كله تمام؟
الحمد لله كله تمام ....هو ده بس اللى يهمك يا نور؟
اتخرست انا طبعا ، طاب ايه لازمه السؤال يعنى؟...ارد اقول ايه ؟ اقول انى مت من الفزع عليك وللا انك وحشتنى موت وللا انى هاموت واشوفك؟!....
يخرب بيتى انا اتهبلت.... ولو فضلت على الحال ده انشاء الله اخرتى هتبقى اوضه ...لا جناح بحاله فى مستشفى!!
ترى هل اكذب على نفسى حين اتحدث اليها بتلك الطريقه او حين انتقى من احاديثك ما يقول انها لى وحدى ...وانها مقصوده؟
الا قولى لى هى الاحلام دى صعبه وللا مستحيله؟
قلتها انا بمنتهى الصراحه والصدق كما اراها بداخلى :
مستحيله....
اعرف انه يعرف ما يدور بداخلى ،ولكن هناك شك 1% انه لا يدرك وهذا الشك يريحنى ،حتى فى هذا اكذب على نفسى انه يعرف...ويصله ما بى من تمنى وتصله كل مشاعرى فانها ان كانت لا تصله فمن المؤكد ان العيب فى انا ورغم ظنى انى اجيد الكذب والكتمان الا انى اعلم تماما ان عيونى تفضحنى.
نعم انها احلام مستحيله ، مستحيل ان اشتهى تلك الابتسامه ولمعان عينيك والكلمات الحانيه الطيبه ، مستحيل ان اشتهى منك فوران المشاعر ، مستحيل ان نكون...
آه ...حلو التمنى وحلاوته فى ولعنا به ورغبتنا العارمه فى ان يتحقق ولو لبعض الوقت
انا مستحليه روحى النهارده مش عارفه ليه يمكن علشان حاسه انى من جوايا هاديه او انى اكلت شوكولا ،هههههههه يمكن والله..!!
وسط الطرشان من غير ما ادرى.... قال جايب عود قاعد اغنى
طرابيش تتهز وعيون ذاهله بتقوللى أعد...وكمان زدنى
أدوزن العده ....وأظبط القعده
أتارى هز الراس ....من تقلها على الجته
شعرت به حين اتى .. تسارعت دقات قلبى بجنون كاد ينخلع من مكانه ...وضعت النظاره السوداء
قالها بمنتهى البساطه :
بجد بجد وحشتينى انا اسف انى قلت كده بس دى حاجه انا حسيتها وكان لازم اقولها.
اصبح كل همى حينها كتمان احساسى الطاغى بالشوق اليه ، ليتنى املك شجاعتك وحريتك ليتنى انطق...
انتهى اللقاء
قلبى يغلى ، وحين لم اقو على تحمل المزيد ... تحينت دمعه واحده الفرصه لتنزل فى موضعها تماما ....تصرخ وحشتنى المكتومه بداخلى .
وحشتنى ايه ما تفهم .... هو انا لازم اقول...
انا عندى شغل الصبح ولازم انام
وكما العيل عيونى تتنطط ،لا لم تثبت .
يانهار ابيض ،راح يكشفنى ،ويعرف انى وانى وانى
راح يناقشنى ،اه هيبعدنى ،هيحددنى .
وانا بقى اصلى كمان اكمنى ،له عطشانه ،وخايفه يشوفنى
هاسرق نظره ووراها نظره.
مش راح يعرف وهاعرف ادارى،مش راح يعرف جوارى متدارى
باينى باخرف ،ده منى انا يعرف
هيرمى لى كلمه كلى يرفرف ،ما اقدر اوقف
خلينى جامده وورا حجابى انا متصانه .
واللى جوايا يفضل دايما.... فى السر... الطف!!
مش عارفه انا جنانى ده هياخدنى لفين
خايفه انك تعرف وخايفه اموت قبل ما تعرف لا بس انت اكيد عارف ،عارف ان اللى جوايا ده اكبر من انى اتحمله ، يارب تفهم بقى لا يارب ما تفهم ...خليك كده احسن
انا مش عارفه من كتر اللى جوايا اكتب...انا هانام احسن لى يمكن احلم بك الليله...
مش عارفه انام الساعه بقت 4 الفجر... شغلت الراديو ، فضل شاكر عمال
" اول ما باشوفك حبيبى بيصعب على مش قادر اخدك فى حضنى واضمك شويه علشان مش دارى بشوقى ولهفه عينى "
ماشى ياسى فضل .....
والله ...أنا عارفه الليله دى مش هتعدى على خير....واذاعه الاغانى تقريبا ناويه تخليها ليله ما يعلم بيها الاربنا
لحظ الرنا قوس رمى .......سهما اصاب مهجتى
عين المها تسبى النهى......... بسحرها تلك التى
هاجت خيالى فظلمت حالى ....افلتت مقود صهوتى
ياليلها يلفها ........عطرى بها واثارتى
ياسلام يا بت يا اشجان ...لو يبقى شايفك كده ....والله انا اتجننت بقى انت ممكن تتهز كده و ممكن تشوفنى انا كده، مستحيل
مش عارفه بصراحه انا باشوفك كده بناء على ايه ....احساسى! مش يمكن احاسيسى كلها غلط
والله انا عارفه نحسى الابدى واللى مش هيفارقنى ابدا
انا قلبى متفرتك..
سنى 12 برايا فاير نبتى صغير ينبت يوجع بيشق الصدر
اخدونى هناك غصب عنى.
شدونى وقطعوا من لحمى
وقالوا لى خلاص اتحصنتى
من فوران بنت وشهوه ست وكلمه حب او رعشه تهد
جوه القمقم حبسونى كلى ،مافيه حد عرف يوم يخرجنى
وكأن الخلقه دى لازم تتشفى ،او ان العوزان راح يبقى دعاره و حرفه
وكأن الجور على خلقه ربى ،يضمن للكل بكاره وعفه
اريدك ولا اريد ان تبتعد عنى عيناك ،اريد ان ازورك كطيف او فكره حتى ...اى شىء ... ارايت كم انا قانعه ،قانعه بمرورى ووجودى فى عقلك ولو للحظات؟
تعجز اللغه وتتضاءل الكلمات وتنمحى الحروف ولا تقوى على التعبير عن شعورى بك ، وأقف انا، لا اقوى على البوح ..
ويبكينى عجزى
البشر دول سخفا جدا ازاى يختصروا كل المشاعر الكتيره اوى اللى جوايا ناحيتك دى فى حرفين ...معقوله
منتهى التسفيه والغباء
انا اتكسف ان يكون هو ده تعبيرى عن شعورى بالحرفين دول وبس ،ده حتى يبقى ظلم للمشاعر دى
نفسى فى اى كلمه تطمين
النجوم بعيده اوى كده ليه الليله دى...
من ساعه ماجيت وانا باتحاسب على خلقى كده..الكل عاوزنى انى اتخنث لاجل اتغطى من عين ده وده
لا انا راجل جامد امشى ادب ،ولا بت نواعم ممكن اتحب
وكان وشوشى دى هابدلها ، حسب الحاله
وكان الجته دى لابسها مليون عفريت
اقلع وشى الاقى تحته وشوش..
قلت وماله كلها الوان،وانا كده فى امان
مادام الاصل اهه متغطى وعمره ما هيبان
اربعه ايام مرت على طويله جدا ،يرتعد قلبى ولم أجد غير الورقه والقلم لافرغ فيهم رعبى ،شعرت بانه يعرف .. ..مصيبه
احب اعرف اهميه انك تعرف مشاعرى ،الموضوع بالنسبه لى انا محرج جدا لآنك قلت لى انه باين على " انتى فاكره ان مش باين عليكى " وده شى ضايقنى جدا
انا حطيت فى بالى انها ممكن تكون احاسيس adolesante وهتعدى وخلاص بقى ....
انا سعيده بالاشارات اللى بتوصلنى وانا باصطادها وعاجبانى واللى ممكن تكون دى طبيعتك بس انا حابه فكره انها لى انا وبس ارجع اقول لا انا اللى باتلكك وتدريجيا كله هيتحط فى مكانه السليم او يعنى هتسيبنى انا بقى اعيش مع نفسى ، انا وانت ما حد منا مضرور ،والله مش عارفه فى الحالتين انا اللى لازم اوقف المشاعر دى لوحدى....انا عارفه انه صعب
ثم انا من البدايه ما كنت حابه ان الموضوع ده يحصل بس انا مش باشتكى منه ،انت غريب والله غريب عاوز تتكلم فيه ليه ..؟
انا والله العظيم عارفه ان الأحاسيس دى مش المفروض تتوجد عندى وده اللى بيخلينى اراجع نفسى بعد كل مره اتكلم معاك فيها تكون خرجت منى كلمه كده وللا كده
وساعات احس انك برضه انسان عادى يعنى ايه اللى هيجرى ممكن تكون فيه عندك حاجه ناحيتى وتتطور؟ ...
يا سلام على التخاريف
اقعد احلل واستنى وتوصلنى منك اشارات قرب جميله ، تفرمل انت بعدها وافضل الوم فى نفسى طاب انا عملت ايه ؟ وللا هو انا عديت حدودى...ما حصلش والله ما حصل
ساعات اشطح واقول اللى جواه واصلنى واللى جوايا مش واصله وساعات العكس ايه بقى اللى بيحصل بعدها؟ على طول افوق نفسى ، لا انا اللى باتوهم حاجات مش حقيقيه وارجع لقواعدى تانى واحطك فى الصندوق الاقيك عمال تصرخ جوايا
لا يا ساره ، انا موجود وانتى عارفه انى موجود وبطلى تخنقينى وتضحكى على روحك ، وانا اهه جواكى ولو سمحتى بطلى تحطينى فى صندوق العلاقات العامه بتاعك ده ،انا لى مكان تانى بتاعى لوحدى وعاوز اروحه
اضغط انا وتضغط انت على بزياده اوى واتنقل لمرحله انى اطلعك فى السر بينى وبين نفسى ، يعنى اكلمك وترد على واشوفك معايا لدرجه انى ساعات اسمعك وانت قدامى بتكلمنى فى دماغك وانا بارد عليك كمان :
انطقى بقى تعبتينى
لا مش قايله حاجه
انت ايه ؟ عميا مش شايفه ؟
لا شايفه وحاسه بس وبعدين والله كده ما ينفع انا كده باتعذب ارجوك خليك فى خانه العلاقات العامه بتاعى احسن لى انا صدقنى...
انا ممكن اكون مندفعه فى مشاعرى دى او مش مظبطاها بس انا سعيده بيك اوى وانت مونسنى وانت معايا على طول وانا باشوفك كده ،سعيده بانى موهومه يانهارى، ده انا موجوده جواه،انت مش فاهم ده بالنسبه لى انا ايه..
كل يوم لى وقت طويل باكتب عنك وعن احساسى بيك ،تخيل باقولك اتهبلت،اهى نسمه بترطب قلبى.
حتى وانا باسلم عليك باسلم وانا خايفه موت غصب عنى تحس بى من ايدى او انسى انا واضغط على ايديك حتى وشك ما بابص له خالص ، وكانى مش مفضوحه رغم ان صدقنى والله انا ما كنت عاوزه انك تشوف ده خالص...وواثقه انى عارفه اخبى..
انا مش مقتنعه انى ممكن ابقى موجوده ولو فى جزء صغير منك وجودى انا فى صندوق زحمه...
انا عندى شى بشع اسمه الحلم ، وانا ما باحب الاحلام عارف ليه؟ لانى دايما اختار المستحيل ، وكانى والله باسعى له وطبعا بما انه مستحيل وعمره ما هيتحقق فاضيفه لمخزون الحرمان
الاول كان كله متغطى وانا كمان كنت لازمه حدودى .
انا زعلانه من نفسى جدا ان سمحت لك ان تشوف ده وسمحت لروحى انه يبان على كان المفروض ابقى احرص من كده
انا سعيده بالوهم ده مستخسره فى ليه بس؟
لو متخيل ان ده هيئذينى انا راضيه ، ما انا يا ما اتاذيت من حاجات مش باحبها ومش عاوزاها وانت لو كان شعورى ناحيتك ده اذيه لى انا بقى عاوزه اتاذى ...ارجوك سيبنى بقى فى اللى انا فيه ده واقفل عليه من فضلك
ما اقدرش اقول انى هيمانه ودايبه من الغرام ، بس اللى جوايا لك حلو اوى اوى اكتر مما تخيل ، حتى لو باخلقه انا يكفينى رغم الاستحاله ان فى يوم ابص فى حياتى الاقي ذكرى كنت اتمناها تبقى حقيقه وانا راضيه بحلاوتها كده يا سيدى افيونه بتبسط عاوز تحللها ليه؟
وماله انت حر وايه المشكله يعنى المهم انا شايفاك ازاى جوايا حاساك ازاى باحلم طاب وماله مش يمكن ؟
الله على وانا باكدب على روحى وعامله روحى بافهم...
لجامى جوايا مش على ضهرى
فرسه وحايره بين قرب وبعد
وسياج واقع وفضا واسع والوان للشمس ... ما تيجى تطل؟
خايفه اخطى ،خايفه اعدى ،تحلى الخطوه واروح ما ارجعش
غرست حوافرى...عندت بخطرى ...وحلفت اتخشب ولا اتحركش
يا لجامى اتشد على ضلوعى ...
الفرجه من هنا.. اكيد... ما تخسرش
انا مش عاوزه اشوفك بكره بس انا وعدت وما يبنفع اخلف
بص انا عارفه ان المشاعر اللى جوايا دى ... يعنى ....انت عارف صناديق المشاعر عندى فاضيه شويه وهم اتنين تلاته يادوب فما عرفت احطك فى اى صندوق الصراحه.
وبرضه انت عارف انا منظمه ازاى وانت عامل لى لخبطه وكان لازم الاقى لك مكان احطك فيه
شاطره انا اوى ماشاء الله ... شاغله دماغى اما طقت منى والمفروض بقى من نفسى مع نفسى اقفل بقى ، وادينى ريحت الجزء المفزوع منى...
عامله روحى فاهمه وباتفلسف،
ده كان تفكيرى الصبح والحمد لله هديت
دخلت انام واهرب منك شويه سيادتك يحلى لك تستلمنى بالليل تفضل تزعق فى وصوتك عالى ومرعب بيخللينى اتهز من جوه وتبهدلنى وبابقى مش عارفه اهرب منك فين تفضل تتنطط لى وهاتك يا اسئله ...
مش عاوزانى جواكى و عاوزه تحددينى ليـــــه ؟... متضايقه من وجودى بالشكل ده ليه ؟ بتدورى لى على صندوق عليه label تحطينى فيه ليه؟ لا وناصحه يا هاله اوى ، ما شاء الله الlabel حضرتك اللى تختارى له العنوان اللى على هواكى واللى لو حد ـ ومنهم انا نفسى ـ شافه او بمعنى اصح علشان لو حد شافه كله يبقى تمام ولا حرج.
بصراحه بقى انا مش عاجبنى ، مستخسره فى مين بالضبط انى ابقى موجود ؟ واللا هو الtaboo اللى جواكى انتى لوحدك بس مش عاوز يقبل بى لأن الblue print بتاعه ما فيه الطبعه دى؟ سيبينى بقى ارجوكى ، انتى ايه ما بتتعبيش ؟ الصندوق اللى انتى مصره تحطينى فيه ده بصراحه كده ضيق على ،انا مش ضمن معارفك ولا الناس العاديه ،خايفه اوى ومرعوبه لاحسن اروح الصندوق القريب اوى كده ليه ؟
عاوزه تخنقينى وما تشوفينيش وافضل مستخبى جواكى كده وخلاص ؟ وللا عاوزانى جوه العلبه الغاليه بتاعتك كل شويه تفتحيها فى السر ،سرقه لوحدك؟
انا موجود مهما ان حاولتى تقولى لا ، انا دخلت من باب ضيق اوى وخلاص عاوزه تمشينى ليه ؟خايفه منى ليه ؟ خايفه اشوف ده ليه ؟
مش عارفه بس ما احب تبقى فيه حاجات مش مفهومه كده ، ثم انا ازاى اسمح لك تنط من مكان لمكان تانى جوايا ، اللى انا فيه ده مش صح ، انا مش عارفه اسيطر على وجودك جوايا ،سيادتك عاملنى ملعب عمال رايح جاى ،مش عارفه ألمَّك انت عامل زى رصاصه انفجرت جوايا!
بس هو ده اللى انت عاوزه تحددينى فيه واتحبس جواه؟
ايوه
مين اللى قال؟
انا
يا سلام على القرارات!
انا حره انا كده مبسوطه ،لا بصراحه مش مبسوطه ...بس
بس ايه؟
انت بتلاحقنى بالاسئله كده ليه ؟
انتى متعبه
انا مش متعبه انت اللى مش فاهم ،انت اما بتروح اى مكان تانى غير مكانك اللى المفروض تبقى فيه بتروح فين ؟ او بتعمل فى ايه،انا باتعب والله باتعب!
انتى ليه مصره تحطى مشاعرك دى فى صندوق له اسم غير اسمه الحقيقى ؟
علشان كل حاجه فى الدنيا لها اسم وانا بقى الاسم اللى متوهمه انك تحته ده مش صح اكيد مش صح
وان غيرتى الاسامى وللا حتى محيتيها كلها هل ده هيغير اللى جواكى ؟
يووووه انت عاوز ايه دلوقتى؟
انتى خايفه من ايه بس؟ من انه يطلع وهم زى ما سميتيه ؟ ولا من انها تكون حقيقه ؟ وللا ما يكون لها صدى ؟وللا ايه ؟
كله ،انت بتخنقنى كده مش طريقه دى
اهدى بس اسمعينى...انتى على طول خايفه، خايفه اعرف وخايفه انى ما اعرف ،وكون المشاعر دى جواكى وانت شايفاها ده معناه انها مش وهم وانها حقيقه فى وجودها ،خايفه من ايه؟ قلقانه ليه ؟ اما حكايه انه ما يكون لها صدى فانا اظن ان كلمه صدى دى واسعه اوى ولها معانى مختلفه يعنى مش قاعده محدده عند البشر وبعدين مين قال لك انها ما عملت عندى صدى ؟ وللا انتى خايفه من انى شفتها ؟
ممكن!!
طيب ما دامت المشاعر دى حقيقيه ايه اللى مخوفك كده ؟
خايفه منها ... دى عماله تكبر بقت عامله زى غول بياكلنى ومش عارفه اسيطر عليها ،هتسود عيشتى صدقنى،انا مش عاوزه اتكلم فى الموضوع ده ،من فضلك ده شى خاص جدا وانت مش من حقك ولا من حق اى حد يتكلم فيه ، ثم انا قلت لك ما ينفع صدقنى ما ينفع ابدا انا نفسى عمرى ما اقدر اقتنع انه دى حقيقه...
مالك ساكته ليه كملى احب اعرف كل مبرراتك فى رفض اللى جواك...
ابدا ما عندى شى يتقال...خلصت كلامى خلاص.
لا عندك وانا عارف انه عندك
عارف ايه؟
انا حاسس بيكى ومن زمان اوى.
هاه كمل ، كمل ...وان اللى جوايا ناحيتك ده مش صح وانها اوهام واحلام وان...وان...
تانى هتتكلمى بدالى ، تانى ؟!
لالالا خالص ... انا عارفه كلامك عارفه انك هتقول ان كل انسان من حقه انه يحلم... بس لازم تكمل الجمله لازم يحلم وهو صاحى وفايق يحلم على القد يحلم بالميزان .انا كنت سعيده كده ووهمانه انه كان ممكن يبقى جواك ولو تجاوب اخرس او مع الايقاف او على الاقل حاجه بتقول اه كان ممكن بس لو الزمن او الظروف غير .
ومهما ان كدبت على روحى وقلت لالالا مش حقيقى يفضل فيه جزء جوايا بيصرخ ومش قابل ان الاشارات اللى وصلتنى منك واللى انا كنت متخيله او باتمنى بمعنى اصح ،انها تكون بتطلع كده منك غصب عنك تقول حقيقه اللى بتحسه وبتطلع لى لوحدى وانك بتفرملها .. كان بيبسطنى حتى بشكله ده ، دلوقت انا اعمل ايه ؟
مين اللى قال كده ؟
انا
ياسلام ،ما تتكلمى انتى احسن واسكت انا خالص مادمتى عماله تتكلمى وتردى على روحك ورافضه حتى انك تسمعينى عماله تتكلمى one way انتى فاهمه غلط .
عادى يعنى وهو من امتى وانا بافهم صح على طول غلط
وهو ده مش حقيقى؟
لا حقيقى اكيد طبعا ؟ استفدت انا ايه دلوقتى؟ انا حتى سرى ده اللى بيبسطنى فى الخفا حضرتك فضلت ورايا لحد ما عرفته وخليتنى اتكلم وطلع كابوس كمان مش حلم،عاجبك منظرى كده عاجبك اللى انا فيه ده؟
هاله .....بصى
بلا هاله بلا هباب بقى ،كفايه كده انا تعبت عن اذنك
بصراحه كده انا مش عارفه ايه اللى خلانى اتخيل الحوار الدرامى ده كله وايه اللى راعبنى اوى كده ،وللا علشان ابقى مستعده للى ممكن يتقال فى يوم من الايام .
يمكن من رعبى قلت اهيأ روحى له واطلع عفريتى انا بقى يعنى بيدى لا بيد عمرو وللا ايه بس ، وللا انى خايفه انه ما يتقال لى وانى اطلع غلط ...
سيناريوهاااااااااات.
أيه اللى هيحصل يعنى هو انا ماكنتش عارفه انه لازم افوق ؟ وهو انا ماكنتش عارفه انها اوهام وانه مستحيل وانها خيالات جوايا انا لوحدى بس ؟ زعلانه ليه ؟ انه شافها وللا علشان عرفنى انه عارف وللا علشان ايه؟
ياللا اعملى فيها جدعه وقولى وماله مش هيقدر ياخد منى احلامى دى ، وانه ما يهمك وانه عادى وايه يعنى ،قولى مش هتتعبى عيب عليكى اوى تحطى نفسك فى الموقف ده،مبسوطه وانتى كده هاه..؟؟
لالالا ...اقولك على حاجه اضحكى على روحك وقولى لروحك زى كل مره يحصل لك فيها شى وحش ،بصى على الجانب المشرق ونصف الكوب اللى ما اعرف ايه واستهبلى ، قولى كويس ان ده حصل ، جه فى وقته تمام وكملى كدب على روحك وقولى ان البشر ممكن تكون فيه بينهم مشاعر طيبه وبس ،
واتعلمى بقى تكسرى نفسك دى شويه وشوفى لك طريقه تتدارى بيها علشان الفضايح...
وبعين حانيه وساعات قاسيه بص لى جوه ، نظره معلم جوه فى ضلعى نظره بنظره
من غير ما ادرى مد عصايته شال لى غمايا
من غير ما ادرى كده ببساطه ورانى عمايا
ابعد عنى.... اوعى تسيبنى ، قول فهمنى
طاب ارحمنى ... مش عاوزه اشوف
سابنى افسر ،حبه الملم و حبه اتكسر
جرسه كبيره قدام روحى
عمركوا شفتوا حد اتعرى والخلق عليه عماله تتلم
عمركوا شفتوا ياولداه بنيه قال فضيحتها من كتر الهم
جانى صدى صوته فى عز سكوته
انا هنا جنبك...لاء ده بعدك ...عارفك واراهنك
انتى لوحدك... اكيد هتعدى.... فى يوم بره السور
انا تعبانه جدا ومرعوبه باترعش من خوفى ، ليه كده بس ...؟ حرام عليك...
أنا مش عارفه اى حاجه ،انا مش موجوده زى ما احب ابقى موجوده مش هينفع.
انا بدأت اتعب بجد انا عريانه قدامك كده ومش عارفه ادارى اى حاجه ، خلاص بان على وانت عرفت وممكن يكون اللى انا حاساه ناحيتك ده بدأ يبقى مزعج بالنسبه لك انت شخصيا...
اتهبل فى عقلى ساعات واقول لا ...ممكن والله يكون اللى باحسه انت كمان تكون بتحسه بس الصناديق حاكمانا احنا الاتنين ،ياللا انا متعوده على كده وخليك بقى ذكرى حلوه ابتسم لها كل ما افتكر كلامك
" قال يعنى انت بتروح اصلا علشان افتكرك " واهو انت جوايا كده حلم جميل وخلاص
حلوه اوى التوهه دى ،لا وقال انا من ساعه ما سعادتك دخلت جوايا وانا عماله اقول لا لا ...وجودك مش حقيقى ولازم اطلعك بقى....
انا كده هاتجنن ، انت اصلك مش متخيل
انا كنت محصنه نفسى تمام ،دخلت لى منين ؟ من دماغى البايظه دى ؟.... ماكانش المفروض يحصل
انا من بدرى اوى وانا ما باعرف اخرج اللى جوايا الا على الورق بالليل قبل ما انام ... دلوقت مش قادره امسك ورقه وقلم واكتب انا باحس بايه ولا باشوفك ازاى ....حتى الورق اللى كتبته قبل كده اتكسفت من روحى دلوقتى انى كتبته ....
ليه كده بس؟ ليه تعمل فى كده ، ليه ؟
اعمل ايه انا دلوقتى ؟ هاتعامل بشكل رسمى اكتر وهاقفل على روحى اكتر واكتم اكتر يمكن اعرف ادارى يمكن اعرف اضحك على نفسى واقول ان وجودك مؤقت
انا عماله اعيد وازيد فى ايه...انا مش عارفه ؟! وكانه درس باحفظه علشان اما امتحن انجح فيه من اول مره !
يخرب بيت كده ارحمى روحك حبه ،انتى ايه موتور عقلك ده ما بيبطلش دوران ؟ اهدى بقى الواضح انك كل ما كنتى بتحاولى تدارى كان بيبان عليكى اكتر ،ايه اللى حصل يعنى ؟ حلمتى بيه؟ وماله اتمنيتيه ...دخل جواكى بالقوه من غير ما سيادتك تفتحى له الباب ...دخل غصب ! انتى ايه مش رحمانى ليه ؟
مش عارفه اقتنع انه عادى... ما يتشاف ...وايه يعنى ايه ؟ أيه اللى حصل ؟
اسكتى بقى انتى ايه ؟ عماله تحطى فى افتراضات وسيناريوهات لاسوأ شى ممكن يحصل وعماله تهرى وتنكتى فى روحك عملتى صوره لكل الاحتمالات اللى فى الدنيا وسيبتى اهم احتمال ، وده اللى راعبك بصى انتى كتبتى قد ايه واتبهدلتى قد ايه هاه قولى السبب الحقيقى اللى راعبك ومخوفك
مش قادره!!
هاه ياللا كملى كملى ،اصلى عارفه ،ومش ممكن ،و مستحيل وصعب و... و..و ،كملى كملى ،عماله تبهدلى فيه جواكى وتشّرحيه وتلفى وتدورى وخايفه تواجهى روحك بالرعب اللى مغطيكى ،كل الورق ده والكلام ده بصراحه بقى كده مش مقنع عارفه ليه ؟ لان ولا جمله فيهم قلتى خوفك الحقيقى من ايه
والله ما عارفه ولا قادره
يا جبانه ، خايفه من ايه... هاه؟
مش عارفه لا مش عاوزه اعرف ، كفايه بقى هو ايه ؟ هو انتى مش نفسى ؟ ما ترحمينى حبه!
لا مش هارحمك ........ خايفه ليه ؟ كل الاحتمالات المهببه حطيتيها ... عماله تودينى وتجيبينى وانا سايباكى خالص واقول هى عارفه هى خايفه من ايه وشويه كده وهتقر ، والله يا ميسى انتى بتصعبى على اوى عارفه ليه؟ لانه حتى بينى وبينك وبينك وبين ورقتك وقلمك رافضه تقولى الحقيقه ،شيلى اللجام ده ارجوكى ده انا نفسك حاطه بينى وبينك 100 سور وباب ليه؟ حتى انا مش مأمنه لى...لنفسك مش مأمنه ،رفقا بحالك حبه انطقى ارجوكى ما تخلينيش اقلب عليكى صدقينى هاتعبك
انتى ايه بتهددينى ؟ انت ايه معايا وللا على ؟
انا عاوزه اساعدك بس ازاى ؟ انتى خرسا ، حتى فى الخفا خرسا ، بينى وبينك خرسا، ارجوكى .... انطقى ما حد هيعرف اللى هتقوليه غيرك برضه فى النهايه انا وانتى واحد
خايفه!!
ارجوكى كفايه انتى خايفه حتى من نفسك ،مش ممكن كده انتى مش مطمنه لى ليه ؟
انتى كده هتثورى على وهتبهدلينى ... انا عارفه
اطمنى... انا مش هابهدلك ولا حاجه هو انتى ناقصه بهدله.؟.. الحمد لله انتى قايمه بالواجب وزياده ،ولا هاثور عليكى ولا عقلك هيشت هو شاتت خلقه ،وبرضه مش هاخليكى تضرى نفسك اتكلمى ياللا يا حبيبتى ...طلعتى روحى ،اصل هاقولك حاجه كل اللى قلتيه ده لو هو خوفك بجد انا اسفه تبقى هبله عارفه ليه ؟ لانك شايفاه واللى بيخوف هو المخفى اللى باين ما بيخوف ،ولا انا غلطانه؟
صح.
طيب انا هاسهلها عليكى ،انا هاقولك انتى خايفه من ايه وارجوكى لو ده خوفك الحقيقى ما تقاوحينى
حاضر بس بالراحه انا مش متحمله
انتى كل اللى كتبتيه ده هو غطا للخوف الحقيقى ومن رعبك ومسكتى فى الغطا وقلتى العفريت اهه ....والعفريت تحت الغطا زى ماهو عمال يكبر لحد ما هيموتك واديكى بتلهى روحك وتلهى اللى قدامك عن الحقيقه
صح ،بس انتى قصدك ان ده مش مخوفنى وانى بامثل؟
بطلى تشدينى مش هاروح معاكى تانى للى عاوزه تلهينى فيه ده
الله!!
انا ما قلت انك بتمثلى ،انا باقول مش عاوزه تشوفى
والله كلامك ممكن يكون فيه جزء صح بس اصل المفروض.....
يادى المفروض بتاعك ده ،المفروض ايه بس ؟....المفروض ان الانسان يخاف من الرفض صح ؟ مش هو ده اللى انتى عاوزه تقوليه ؟
ايوه...بس
اكمل ادينى فرصه ، انتى خايفه من القبول
ياسلام هنهرتل بقى ،انتى مش عارفه حاجه
لا عارفه واكتر منك واهدى كده وبلاش مقاوحه
اتفضلى
انتى انسانه معوده روحك على الرفض بحالتك وشكلك وظروفك وكل حاجه فيكى ، حتى مشاعرك وعقلك وجسمك وكلامك كله كله مرفوض، وخلاص طبعتينا على كده وانا كنت باجاريكى ، لان دماغك صرمه قديمه ، انما لحد كده وكفايه عماله تبهدلينى انا وعقلك علشان تطلعى صح وكل مخاوفك الحقيقيه مستخبيه تحت غطا الرفض خاصه بقى فى موضوعك ده .
انتى خايفه ...انا عارفه.... وما تهجمى على من فضلك ولا تقاطعينى انتى خايفه اكتر من انه يقبلك زى ما انتى كده ،مش متخيله انه فيه حد ممكن ياخدك شيله من غير ما ينحتك على مزاجه
تفتكرى؟
ميسى انتى مش دماغ سهله،زى ما بتقنعى روحك ،خايفه انه يقبل مشاعرك دى!
انا عارفه انه مش هيرفضها....عشان
اه اه ...انا حافظه الكلام تحبى اسمعه لك ؟ انتى خايفه ليكون بعد الشر ولا قدر الله
انتى هتتريقى؟!
عاوزانى اعمل لك ايه ؟ اه باتريق ،اتحملينى حبه انا ياما اتحملت غباءك وعنادك، ده انتى طلعتى عينى سنين طويله
ما تكمليش ارجوكى بقى
لا هاكمل وابقى ورينى هتسكتينى ازاى؟ حتى لو نمتى هامسكك فى احلامك وافوقك ومش هانيمك الليل ومش هاسيبك غير لما تسمعينى ،خايفه لتكون مشاعره ناحيتك زى مشاعرك ناحيته وما تقوليش مش ممكن لانى عارفه كل مبرراتك ده احنا دافنينه سوا،خايفه يكون فيه تجاوب منه لك ،خايفه يكون فيه نقطه اتلاقيتى فيها انتى وانسان تانى ،خايفه تشوفى انه فيه انسان تانى شايفك ،خايفه انه ينطق ويطلع حاسس هو كمان ناحيتك احساسك ناحيته وعامله اسوار انك تحسى بده منه ،احلف لك هو عمره ما هينطق حتى لو احساسه بك اكبر من احساسك بيه ، عارفه مش هينطق ليه ؟لانه بيخاف عليكى، انا مش باجزم ، بس والله صدقينى اللى وصلنا منه اكبر بكتير من علاقه الاخ والاستاذ والمعارف اكبر من كل الframes اللى انتى عاوزه انه غصب عنه يتسجن فيها
صدقينى انتى بتجرحينى اوى اما تحجمى الحكايه فى الشكل ده عارفه ليه؟ لانك بتقولى لى انى عميا ومش باحس وحتى نعمه البصيره اللى ربنا انعم عليكى بيها رافضاها انتى شوهتينى خالص وانا متحملاكى اسمعينى بجد... بصى ...انا شفت منه كتير اوى وعرفت برضه من غير ما ينطق وحسيته من غير ما يتكلم ... فاكره اما كنت اقولك هيتصل ويتصل فعلا ؟ فاكره اما تردى على كلامه وهو ساكت قبل ما ينطق بيه؟ فاكره اما قلبك بيدق وهو جاى من بعيد قبل ما عيونك تلمحه؟ كل ده ناسياه ولا مش شايفاه وما تقولى صدفه لانها مش صدف
مش واخده بالك منى ليه ؟ مش شايفانى ليه ؟عشان البراويز بتاعتك ..انا عارفه انك بتقولى انه انتى اللى بتعملى الحوار ده وانه ما فيه حد بيتكلم معاكى، لا انا اهه باكلمك ثم عقلك وانا وانتى زى ما قلت لك واحد انتى حاطانى فى الضلمه وخنقانى على طول ،دى اول مره تسمعينى وعلشان كده انتى مش مصدقه روحك والله انا ما هاضيعك بالعكس ...حبستك لى دى خلتنى لسه pure مش مصديه وعندى حاجه كده شايلاها لك ،حاجه مش موجوده الا عند الاطفال وبس ،يمكن مش عارفه اسمها بالضبط بس زى ما تقولى كده احساس عالى ،بصيره ،رؤيه اهى حاجه تخليكى تحسى وتقرى صح!!
انا باينى اتجننت وعقلى ضرب
لا يا ميسى عقلك لا ضرب ولا اتجننتى ولا حاجه
مش عارفه!!
خايفه من ايه؟ خايفه يكون هو كمان زيك له حلمه
خايفه ليه منه ؟ عارفه لو هو يخوف كنت بعدتك عنه من زمان اوى وافتكرى كده كام واحد حاول ده وانا بعدتك عنهم،افتكرى كويس ، صدقينى هو كمان عمره ما هيخرج بره بروازه ، انتى مش خايفه منه هو لانى واثقه ان انا وانتى لاول مره متفقين على رؤيه واحده لشخص واحد ...انت خايفه منى انا لاصغرك واخللى لسانك يفلت او تتجاوزى ...عارفه انا وهو برضه عارفين اسوارك وحدودك وخرسك وانك عمرك ماهتسمحى لروحك انها تفلت منك،انتى بس اللى مش عارفه ده وخايفه منى،صعبان عليكى تقوللى انه فى بالك صعبان عليكى تسمى شعورك ناحيته باسمه الحقيقى صعبان عليكى تنطقيها حتى بينك وبين نفسك كل اما تيجى عند نطق الكلمه تلفى وتدورى ... وللا خايفه يستهيفك ؟عمرى ما شفت حد يستهيف حد علشان بيحبه !!!
ده من جبنك ما كتبتى اسمه ولا مره واحده...حتى ده ما بتقدرى عليه ثقى فى شويه وصدقينى اما اقولك اللى جواه ووصلك صح واللى جواكى ووصله صح ،كون بقى الحياه والظروف لهم احكامهم عليكم ده شى تانى صدقينى ده انسان... بشر... بيحس ...واحساسه رقيق واظن ان انا وانت بقى عارفين ده هو يمكن يبان ...او هو فعلا جامد وما تفهميهوش بس برضه ورا الماسك ده فيه شى تانى انا وانت بنحسه ،والله انتى مسمعه عنده وجامد اوى وهو كمان محتار وزعلان زيك..عارفه ليه؟ لأن حضرتك دخلتى له من غير استئذان ،كل مبرراتك اقسم لك انها عنده وخوفك ممكن يكون نسخه من خوفه ،بس هو اشجع منك طلع عفريته قبلك علشان يخلص
انتى بتكذبى على وبتقولى لى كلام يريحنى ونفسى بس احس انه صح والله هاكتفى بيه لو صح بالصوره دى
هاكدب عليكى يا هبله علشان اتعب انا وانت بعد كده ؟ انتى شكاكه حتى فى انا بتشكى ،بصى انا مش باقولك هيحس بيكى ويقولك والله وانا كمان... او اللى عندك عندى ، لا اوعى تفتكرى ده اللى باقوله لك اانت وهو مضبوطين على موجه واحده ...مش يمكن ؟مين عارف؟لا انا ولا انتى ولا هو نعرف بكره ده فيه ايه؟ مش يمكن ربنا يغير الحال ..؟ ساعتها هتعرفى انى لاكدبت عليكى ولا ضللتك ،انتى كمان عارفه انك جواه بشكل ما.. يعنى اوعى تفتكرى ان دى افيونه بتخدرى بيها روحك زى ما سفهتى الشعور الحلو ده ...شايفاكى امنتى لى شويه صدقينى والله... اوعدك انى هاريحك بس بصى لى شويه بس واسمعينى... وانا هاسيبك تنامى ولو طلعت صح هنفضل سوا على طول ولو كدبت عليكى هتحبسينى تانى... انا عارفه
أوكى
طيب نامى بقى وارتاحى وريحى دماغك دى حبه
انا باينى اتجننت
تااااااانى ! نامى بقى
والدم يطرطش حصن من العار
وكانى دبيحه وذنبى انى حوا....او ان الدنيا دى ملعونه ...بهى.. مش هو .
خللينى راجل البس زيه اعمل زيه ...وده بقى متصان
مشيك يبطأ حسك يوطى .........
مايصه كده ليه؟ .......بتتدلعى ليه؟
امال انا ايه واد لابس بت؟.! ....
والله ماعرفت ولا حتى قدرت .......
راح اقلع جلدى والبس جلده والناس رافضه ........
طاب خلينى بخلقه ربى والناس رافضه
حسيت ناقصه انا مش عايشه....
لا اعرف نَفسى... لا اعرف نفسى
برايا يفور... انا ست بجد .....صوتى مشيى كسمى رسمى ............
والله ما انا داريه انا رحت لفين....... لاانا طايله الواد ولا عايشه البت
تايهه يا ابويا وفين لما فهمت .....عاوزينى الصبح البس جلده ....
وفى ليلى معاه ابقى ب100 ست .
الحمد لله نمت لى اربع ايام ما بانام مرتاحه الى حد كبير ،احسن الحمد لله ، مش قلقانه بس متوتره ،اصل هيحصل ايه يعنى؟
بصراحه كده لقيت ان رعبى ده ماله مبرر او له بس مش بالحجم المهول ده
حتى لو كدب على وقال لى انتى غير اى حد مهما بقى ان كان قصده وحتى لو كدبه انا بقى مستحلياها وكفايه على
انا كده مبسوطه ،انا فى اى مكان جواه ،يعنى هى خانه العلاقات الانسانيه بتخلى ؟ مش مهم
المهم انا حاسه بيه ازاى حتى لو هو قنن ده او حجمه انا راضيه المهم انه فيه شى
وملعون ابو الصناديق هو موجود جوايا وانا موجوده وخلاص
اووووف ،انا كده احسن بكتير
الليله دى حسيت بشى جميل اوى برضه عمرى بحياتى ما حسيته
والله انا ما كنت احب انك تتجاوز حدودك جوايا ..انا متضايقه من ده
وهو انا تجاوزت مش يمكن المكان ضيق على ...وبعدين يعنى انتى اختصرتينى كلى فى كارت عليه اسمى وبس؟
انا كنت لسه كاتبه الكلام ده عنه من فتره واتخضيت انه بيقول نفس الكلام
ما اعرفش
يعنى انا ممكن احطك فى دايره المعارف وبس؟
وعمل بصوابعه رسمه دايره
والله انا ما اقدر اتكلم بالنيابه عنك ....انا كنت احب ان انت تفضل فى الدايره دى عندى انا... بين الصباعين دول بس
طاب وانا اودى امل دى كلها فين ؟ الانسانه والعقل والمشاعر والشياكه
قلبى هيقف ....هاتفضح
والله ما اعرفش......ثم انا متضايقه انى بيبان على
مين قال....انا شايفها حاجه حلوه
يخرب بيت كده كان وهمى انا شايفاه كده مع انه مش حلو خالص بس هو فيه حاجه بتخلينى من جوه اتنطط اما اشوفه او اسمع صوته
ربنا يسعدك زى ما بتسعد قلبى كده حتى لو من غير قصد
كلامك تاااااااااااانى
انا حسيت من كلامك النهارده انك عاوزه تطفشينى ؟
بالضبط كده
انتى ليه عاوزه تطلعينى منك؟
كده انت وجودك مضايقنى وانت اصلك مش هتتخلع الا بكماشه
هتخلعى حته منك ...؟ هتسيب علامه
شاور بايده على دراعه وكانه بيقطع حته بقوه ووجع كمان
هابقى اداريها
انتى هتدارى ايه وللا ايه؟
.... كويس والله انك عارف انك حته منى
انا حاسس بيكى والله ؟ هو انتى ما تحبى تشوفينى تانى؟
غمضت عينى ومن جوه كان نفسى اقوله كفايه تلعب بى بقى
مالك ؟
ابدا بس انت اما بتتكلم كده انا دماغى بتتلخبط وما باعرف اركز
مارديتى على سؤالى؟
أى سؤال ؟
عيدى الشريط كده
اكيد احب اشوفك طبعا
ابتسم ....خبيث ولئيم
والله انا مش عارفه هو عاوز منى ايه وللا هو مبسوط وانا كده وللا ايه بس ؟
مره فى قعده ، ،زنقنى عصرنى
خفت اتكلم ،عندى منعنى
واقف ثابت ... عاوز يسمع
رافض حتى انى اتمنع
لسانى يلخبط ....وعقلى يظبَّط
سمعنى باقول له .... لاءه ما ينفع
بص لى جامد ، خلانى ادمع
وصلنى تحدى....
بعينك أطلع
هل زرت مكانا مقدسا من قبل ؟ هل دمعت عيناك هناك؟
اننا لانبكى لذنوبنا ولا لخطايانا .... وانما نبكى ضخامه مشاعرنا المحبوسه والتى لا تقوى اجسادنا الواهيه على تحملها ولا تكفى مفرداتنا القزمه للتعبير عنها ،فنبكى!
هكذا اكون حين اراك وحين تبتعد وحين افكر فيك وحين اكتب عنك
انا لاادرى بم اشعر ولكنه شعور يرسم الابتسامات وياتى بالربيع والشمس لتدفىء البرد الساكن بى...
ابتسم حين اتذكر ايا من كلماتك ابتسم حين اراك بداخلى قابعا فى مكانك ترفض الخروج....
عنيد انت
لم الان؟ لم ؟
الا يكفينى ما انا فيه ،ليس اوانك ولا هو موعدك ،ابدا"!!
اشتاق اليك ولا اريد منك سوى.......الا تحرمنى
باتخيل شى وحيد بس ان ممكن ييجى يوم ابقى انا وانت بس وملعون ابو الناس وابو الصناديق وكل البراويز وكل الحدود .
غريبه اوى الدنيا دى ...تقابل ناس صح فى وقت غلط ...
العادى بتاعى ...ايه الجديد؟!
ساعات الوم نفسى على وجودك .... حرام عليك ...لا انت ما ذنبك شى..... حرام على انا نفسى واللى باعمله فيها ده
طول النهار مشغوله وانت معايا
بالليل بقى افضل اعيط ...
اعيط من انى ما اقدر اكلمك وقت ما احب من غير حسابات ومن غير ما ادور على حجج ...
نفسى اقول اللى باحسه بصراحه ...
نفسى اعرف هو انا فارقه وللا مش فارقه ؟ انت شايفنى ازاى ؟ انا فين منك ؟انت شايفنى ؟
كان سجن كبير ضلمه وعتمه ،وانا طير نونو ،يادوبك زغب ماطلعلوش ريش
قلت اما اقوى او لما اكبر يمكن اقدر ،
جه طير اكبر يمكن اقوى يمكن اعفى
قاللى تعالى
قلت وماله ،خلينى معاه مطرح ما يحط مطرح ما يطير
حسبه بسيطه ،راح ادفع تمنى ،اكيد هيسيبنى ،ومش هاستخسر هادى له كتير
كبرت لقيتنى الطوق بقى منى علم فى وقع لى الريش،
مديت ايدى
دوران بارز ،حافر لحمى،وعرفت اقرا
اتارينى مختومه بختم اسير
انت لعنه
بس لعنه بقى انا مش عاوزاها تروح ولا طالبه منها شفا... عاجبانى بصراحه ...لعنه تلبس الروح كده وتاخدها تبقى روحى ومش بتاعتى ....معاك انت انت طلعت لى منين ؟
عارف نفسى فى ايه؟ ......عاوزه ابص لك بس شويه اشبع منك ولو انك عامل زى الشوكولا كل ما تاكل منها تشتاق لها اكتر وما تشبع
نفسى تطبطب على ..... نفسى تقوللى ما تمشيش ....انا عاوز اتكلم معاكى ،نفسى مره تطمن على ،نفسى تقوللى انا هافضل وراكى علشان اطمن بس انك وصلتى.... نفسى تعمل لى مفاجأه تجيب لى cadeau منك انت...لى انا...بمناسبه ايه مش عارفه بصراحه... بس انا نفسى فى كده ....انا حره.... الله ....!
نفسى احس انك مستنينى ،نفسى اعرف عيد ميلادك امتى ،نفسى ادخل جوه دماغك دى واعرف فيها ايه ....
نفسى .......نفسى فى حاجات كتيره اوى اوى ...يااااه !
ايه ده؟ انا قلبى وجعنى فجأه كده ليه ؟ايه اللى انا باقوله ده ؟ ده على فرض ان انت شايفنى اصلا زى ما انا احب اتشاف يعنى وللا ايه ؟
انا حالمه بزياده بزياده اوى كمان....ليه كده بس ....؟
عجبى عليك يا زمن حافر وشوش باخلاص
حفرك غويط فى الجته وكانك بتحط اساس
اتحايل عليه ، ما تقرب ...ده انا جلدى مشرَّط من الناس
يقوللى اشمعنى انا اللى ما أعدى...هى جت على انا وخلاص؟!
حلمت حلم جميل
ممكن ادخل المطبخ اعمل قهوه؟
اه طبعا ، خدى راحتك
انت اتكلمت فى التليفون والمكالمه طولت نزلت من غير ما اسلم ولا حتى انت تاخد بالك .
الباب خبط لقيتك باعت لى ورقه
خطك وحش اوى ومنعكش
انا اسف انك مشيتى من غيرما اخد بالى ،انا استنيتك تيجى ما جيتيش ليه ؟.
حطيت الورقه جنبى وقلت هابقى اكلمك اعتذر انى ما جيت ..
الباب خبط تانى ولقيت ورقه تانيه
بصى على ضهر الورقه ارجوكى ......
الورقه ضهرها مكتوب عليه ....انا مستنيكى تحت لى يومين ،لو ما نزلتى هاطلع لك انا ....
قلت فى نفسى .... حاضر ..حاضر هانزل
الفجر اذن وانا صحيت مبسوطه انك مستنينى...
والله باينها المعاناه المميته اللى كنت فيها هى اللى اثرت على !
بص بقى ،انت وجودك بقى مزعج جدا بالنسبه لى ،انا ما اتعودت على انه حد يشغلنى كده الله ....
مش قلت لك دخلت لى من دماغى البايظه دى ؟!
انتى عارفه انى مهتم
ايه تون الصوت ده سيادتك بتتدلع ولا مكسوف وللا ايه ؟
صوتك كان هادى وقاطع ضحكتك حلوه اوى ....باحبها وزى ما قلت وبتبسطنى
انا كتير الاقى فيه لك رسم جوايا ما ينفعش تخرج عنه ، ما ينفع تبقى كذاب او مش قد كلامك ، ما ينفع توعد وتخلف من غير مبرر...
او تبقى نكدى زيى كده ...ما ينفع تبقى دماغك فاضيه....طبل
ما اقدرش اتحمل راجل هايف او بغبغان ....او انه يدينى اوامر من غير لو سمحتى او ممكن قبلها...صوته يبقى من دماغه ...وما يصدق ان لى دماغ بتشتغل وعقل بيفكر وعيون بتشوف زى عيونه يعمل الشرع حجه ...الرجال قوامون على النساء... وياخده سبب لتهميشى ...
ياترى انت بتسمع؟ بتشوف؟بتشارك وتاخد بالك ؟ ياترى بتقدر وتشكر؟بتغضب وترفض بصراحه؟بتعتذر لما تغلط ؟ بتعترف انك غلطت اصلا ؟....
حاساك صعب وناشف كده ...باخاف منك ساعات....اه والله بجد .
الا قول لى هو ده برضه ضمن تعديلاتى للناس والبراويز اللى باحطهم فيها وللا ده حق طبيعى؟
ساعات احس انى باطلب شى مستحيل ، ساعات احس ان دماغى بتشت ،وانها كلها اوهام ،وساعات اقول لا ،وساعات وساعات
الضل جمل على الحيط مرسوم ....يمكن حملى ..........هم راكبنى.... فاكرينه سنم ...و عامل لى اتب........
متدارى انا فيه....
الف خساره الضل جمل والاصل فرس ....
بارك على الارض ......ورجليه تحتيه
قررت ان انهى حيرتى وتوهتى وان اتخلص من نفسى... منك .
لااقوى على الامساك بالقلم لابث له شكواى.
عقلى فارغ ...اشعر بحجر ثقيل يجثم على صدرى ...ياخذ انفاسى
تنزل دمعه واحده لتواسينى ...تنزل فى صمت وتؤلمنى
اكره قلبى وعقلى اكرههما les deux sont des salops يميلان واعرف كم يعذبانى حين يميلان ،اتمنى الان فقط ان يصبح لى قلب من صخر لا يشعر ولا يتالم ولا يتمزق ، اكره ضعفى هذا وشعورى هذا ،اكره التورط....
انا شفت الهديه بتاعتك ورغم انى كنت مروح ميت من التعب بس ما قدرت اقاوم وفتحتها
طاب كويس
تقيله الورق حلوه اوى اوعدك انها هتكون ضمن الحاجات اللى هاحطها على مكتبى،ميرسى انك افتكرتينى
افتكرتك... مش باقول لك انت مش فاهم اى حاجه
انتى زعلانه انى عيان وللا انك قررتى تهربى منى....وان دى اخر مره هنشوف بعض فيها؟
الاتنين
لا انتى زعلانه علشان دى اخر مره ..انتى اللى بتحرقى روحك وعاوزه تهربى
اه
ايه مالك ساكته ليه؟
ابدا ما عندى شى يتقال
لا عندك خللى اللى جوه ده يطلع بره احسن
ما فيه شى جوه
Blank – يعنى؟
بالضبط كده
I will miss you too
طلعت منه فجأه هزتنى وكانه شاف اللى جوايا ورد على كلمه مش عارفه تطلع
عارفه I hate good byes ...انا كنت عاوز اشوفك وانا احسن من كده....ساكته تانى ليه؟
ولا حاجه ،اتكلم انت وانا ارد
انتى عارفه.؟..انتى ذكيه جدا
لا ما تقوليش انتى عارفه انا ما اعرفش اى حاجه خالص ،انت اللى عارف لانى اتكلمت....وبطل تقول لى انتى ذكيه دى ....
انتى اللى قلتى ،قلتى ليه لما انتى مش عاوزه غير انك تهربى؟
انت الى فضلت تضغط على لحد ما نطقت
انا محترم قرارك ده ...انتى معاكى ارقامى صح؟ ابقى طمنينى عليكى بس
ولما انت المفروض انك قال يعنى هتقلق وللا هتفتكرنى اصلا ما تتصل انت تطمن... سكتت وما رديت
عامه حتى لو هربتى منى انا جوه you will not loose me والدنيا صغيره اوى وهاشوفك اكيد فى يوم من الايام ....هتيجى تسلمى على ...وللا هتعملى نفسك ما تعرفينيش؟
اقوم اخنقه انا وللا اعمل ايه ,مش ممكن... انت ايه ؟ انت يا إما عاوز تضايقنى او بتتغابى بقى وانا مش ناقصاك النهارده
مش هاسلم ليه انشاء الله؟
العادى انتى هربانه منى بارادتك انتى اللى اخترتى الوجع
يا سلام !!!
قلتها باستنكار وسخافه
طول الوقت لا بصيت له ولا اختلست حتى كعادتى نظره...تعبانه لدرجه انى مش بافكر حتى !
الجو برد
انتى اللى لابسه خفيف
انا باحب احس بلسعه البرد دى
هو انتى ناقصه سقعه؟
وجعتنى الكلمه اوى ...
حسيت بشى غريب ...اتحرك همسه من على كرسيه وسمعته جواه كانه بيقول حاجه ...لالالا مش ممكن واضح ان الريسيفر بتاعى بيشوش وبيلقط غلط .."
انا عمرى ما شفت حد بيعيط لجوه... بطلى عياط بقى... معقوله اخر مره اشوفك تعيطى كده
انا ماسكه نفسى بالعافيه والا هاتبهدل بجد.... ثم انا على طول باعيط
انا شفتك بتضحكى كتير واللى شفته منك بصراحه عمرى ما شفته فى حياتى كلها ...اكيد هييجى يوم واشوفك تانى...
مين عارف؟
صح عندك حق ، مين عارف ؟
قمت من مكانى ورجلى مش شايلانى اصلا ...ما حبيت ان يشوف حالتى دى ...او يعرف انى ضعيفه وخايبه كده
لا استنانى اخد حاجتى ما تستعجلنيش
لا خدى راحتك ، انا هاوصلك لحد الباب
رسمت ابتسامه ماسخه وكأنه عادى.. ولبست الف ماسك يدارى.....
كل مره بيبقى بينى وبينه مسافه كبيره شويه واحنا بنسلم على بعض ، المره دى المسافه كانت غير... حسيته قريب اوى لدرجه انى حسيت بسخونه فى راسى ... سلم على وانا هربانه بعيونى وعقلى مش مستوعب ....عينى لثانيه جت فى عينه ورجعت هربت تانى ... حسيته عاوز يقوللى حاجات كتير وما قدر ....بس انا شفتها ،والله قريتها صح ...المره دى انا متاكده انها صح ...
خفت ....كل الماسكات كانت هتقع وكنت لا هاقدر اسكت ولا ادارى ولا هاعرف اكدب زى ما على طول بعمل
طبعا هو اتخرس وانا اتخرست ....وعرفت يعنى ايه الواحد يعجز
عارف انت ايه؟
انت عامل زى الوشم ،وشم على الضلوع ،وشم الجلد ممكن نمحيه ويسيب علامه تفكرنا بانه يااااااه ده كان فيه هنا حاجه ،انما وشم الضلوع علشان ينمحى لازم نموت ،وحتى ان متنا هيفضل هو برضه محفور جوانا... فى عضامنا
انت وشم لا ينمحى الا بالفناء او الموت
اخاف من ان تنسانى انت !
مش بانام ....
ساعتين بس اللى نمتهم وقمت من النوم جسمى كله واجعنى...تصدق بطلت اعيط ...
حاسه انى منهكه.... صوتى مخنوق .......ودماغى فاضيه خاااااااااالص ، جوايا حزين وكانه راجل عجوز ساكت ما بينطقش حزنه دافنه جواه ، حاسه انى اتخرست والخرس دابب فى من جوه.
انا لى يومين اهه ما نزلت من سريرى ،من ساعه ما قمت اسلم عليك
انا بجد مؤذيه عارف ليه؟
جيت اهرب من روحى ولعت فيها.... حرقتها ...!
يا ريتنى اعرف اقولك
انا عيله ومش قد كلمتى ...مش عاوزه اهرب ......مش عاوزه...انا رجعت فى كلامى ....حرمت والله حرمت
النهارده مش انت اللى هتتكلم انت هتسمع وبس ولا تقاطعنى ولا عاوزه اسمع صوتك خالص
انا تعبانه ،انت مش فاهم انا تعبانه ازاى ولا هتعرف الوجع ده عامل فى ايه؟
عارف
عارف ؟...عارف ايه ؟ ...انت ما تعرفش اى حاجه اصلا ؟
تعرف انت ايه عن اللى انا فيه؟ تعرف انت ايه عن القلب لما يتخلع بالقوه ...وتمد ايدك انت تشيله ترميه على الارض وتدوس عليه ...وما ينفعش تصرخ ولا تقول اآآآآآآه ...
تعرف انت ايه عن الانسان اما يعيش اهو يادوب نفس داخل وغيره خارج وبس
تعرف انت يعنى ايه حرمان؟ تعرف يعنى ايه تبقى ميت من العطش وقدامك بير ميه ورايق ومش قادر تمد ايدك تغرف منه غرفه واحده بس ...بينك وبينه 100 حاجز شفاف.. علشان عذابك يبقى اكبر ..تبقى شايف ومش عارف....يادوب كل اللى تقدر عليه انك تستطعم الميه فى خيالك على طرف لسانك وتوهم نفسك انك بتشرب وما تعرف غير انك يادوب تبص من بعيد وتقول نفسى مره واحده بس اعرف اعدى .. وانشالله بعدها اموت..او تكدب انا مش عطشان اصلا ..تعرف ده عامل ازاى ؟
تعرف الروح اما تطلع منك وانت حى وياريتها بتطلع وتخلص بقى الا لا ... ده فى النص يعنى لا انت ميت ولاانت حى... و تخنقها وتموتها كل يوم ...قال ايه عشان تعيش !! وتقنع نفسك انه كويس انها جت لحد كده....
انت ليه قاسيه على روحك اوى كده؟
اسكت .... انا قلت انا بس اللى هاتكلم
تعرف يعنى ايه تهرب؟ تترعب ؟ تخاف ؟ تعرف يعنى تتدارى فى ضحكتك ...علشان ما حدش يشوف حاجه ؟ تعرف يعنى ايه تبص على وشك ما تعرفه من كتر الوشوش اللى انت لابسها واللى بتبدلها حسب الحاله علشان ما يصحش وعيب وووو....محبوس جوه صناديق وبراويز ولازم تلعب دورك باقتدار...وما تقدر تقول لا مش قادر ..كفايه مش عاوز...تعبت...؟ وتعدى عليك ليالى وانت مرمى لوحدك فى ركن على الارض فى اوضتك زى العيل الصغير ، متكور على نفسك مذعور ، مذعور من ان العمر هيعدى وهتموت وانت كده ؟....وعمرك ما هتشوف نفسك فى عين حد تانى ولا عمرك حد هيحس بك ...ولازم تستحمل ...واهو تبقى بتصحى الصبح وتستنى الليل ييجى علشان السنين تعدى..... وتخلص... واخرتك تبقى مجرد اسم هيتشال من خانه المواليد وينضاف لخانه الوفيات لا اكتر ولا اقل.... !
تعرف يعنى ايه الواحد كل ليله تمر حياته قدامه شريط طويييييييل يبص على روحه يلاقى الدنيا حواليه زحمه اوى من بره بس ومن جوه فاضيه على الاخر؟... عايش ترس فى اله.. يوم ما يعطل يترمى وييجى غيره ..ولا تفرق ...ويبقى كل همك انه ما حدش يعرف ده ولا يعايرك بيه ....فتتكتم ... و تستحلى الالم وما تبقى عارف تعيش من غيره وتخاف تسيبه لاحسن ما تعرفش انت مين... من كتر ما بقى حته منك ....وتبقى هتموت ان حد يقولك عنك حبه انا معاك انا جنبك ...حد يقولك اتسند على ...حد يقولك حملك ده ما ينفع تشيله لوحدك تقيل عليك سيبنى اشيله معاك ..وما تلاقيش، وما تسمعش غير صدى صوتك انت...سقعان من جواك... ولما تتسئل اخبارك ايه ؟ ترد وانت بتبتسم ابتسامه تشقق الجلد، لا كله تمام !! وانت وجعك معلم فى لحمك كرابيج ..سايب علامات بالدم... والدنيا عماله تشيلك وتهبدك ....واديك مربوط وداير فى الساقيه تعرف انت ده ؟ جربته ؟ صرخت منه ؟
تعرف انت ايه عن العيون اما تهرب على طول من خوفها لتفضحك ولاحسن واصل وفصل ،تعرف انت ايه عن الواحد اما يحس بجد ويضحك على روحه ويقول لا دى تهيؤات...وقلبك يتعصر .... وانت مستنى انسان واحد بس من الدنيا دى كلها مش عاوز منه شى مستحيل ،مش طالب غير كلمه عاديه..ازيك ...؟ كلمه مش هتنقص منه حاجه.... بس هتحييك ....وعاوزها تطلع منه ...تحس فيها بانه مهتم وبيسال عنك انت وبس ...وما يحصل وتطلع له مليون مبرر ومنهم انك ولا حاجه وانك مش فارق تعرف ده ممكن يعمل فيك ايه؟
تعرف يعنى ايه تشوف نفسك عدم؟موجود بمناسبه وجودك فى المكان وبس واول ما تغيب ما فيه حدش يفتكرك ولا تمر عليه كخاطر حتى ؟
ويبقى نفسك يتقال لك كفايه بقى ...فوق من اللى انت فيه واعرف ان اللى انت شفته وحسيته ده سراب ... حواديت عشتها مع نفسك ... مش موجوده اصلا ....وتبقى متاكد انك هتتعب اوى كمان بعدها، بس تقول على الاقل ادينى شفت وعرفت وتجمد على روحك..وتكابر وتعند وتقول مش مهم
تعرف انت يعنى ايه تقعد كل يوم تكلم حد مش موجود؟ وتمشى تدور عليه فى وشوش الناس وقلبك يتنفض اما تشوف بس حد يشبهه وانت عمرك ما هتقابله ولا هييجى ... وتلاقى فى ثانيه الدنيا كلها بقت تشبهه... بقت هو ....؟
تعرف يعنى ايه تبقى تايه؟ تعرف يعنى ايه حد يملك يومك كله ما بيمشى ولا بيفارقك ؟ تعرف انت ده ممكن يعمل ايه فى البنى ادم من جوه؟ تعرف يعنى ايه ما تصدق الكلام اللى بيتقال لك مع انك مستنيه وهتموت وتسمعه وتبقى مبسوط بكدبك على روحك وعايش الوهم ، وان جه يوم وحصل اللى بتتمناه ما تصدق..وان ما حصل برضه ما تصدق ...والدايره ما بتقف عماله تلف حواليك وساحباك جواها ... ولا انت عارف الصح من الغلط ولا عارف تصدق اى حاجه اصلا..
وتخلى الكدبه محور لحياتك وتدمن اللعبه وتفتكرها بجد ... وتعيش مع خيال ..وكانك بتكلم ميت مستنيه يصحى وعمره ما هيصحى مستحيل ...اكيد مستحيل
تعرف انى باحط ايدى على وشى كتير اوى على انها ايدك انت...علشان اطمن روحى ...؟ تعرف انى عارفه انى زباله انى باعمل فى عقلى ونفسى كده؟
تعرف يعنى ايه كل اما تيجى تهرب من انسان يجتاحك بقوه اكبر؟ تعرف يعنى ايه وجودك بقى يهدد وجودى انا نفسى؟ ...انت بقيت ملازمنى ومسيطر على دنيتى كلها .....
تعرف انك لعنه وانى باكرهك ومش عاوزاك تبقى فى حياتى تانى وعاوزه امحيك؟...انا لازم اطلعك من جوايا ، اخلعك بالقوه بالجبر...
تعرف انت ايه عن الدموع اللى مغرقه وشى دى دلوقت واللى نازله لانى باكدب ........اوديك فين طيب ؟!.....واروح منك فين بس ؟ ...انا لا انا لاقياك ولا عارفه اطردك
انا باكره روحى وعاوزه اهرب منها ...عاوزه اهرب من الدنيا كلها ومن نفسى ...بس ازاى ؟..قول لى ازاى؟
تعرف انى لو شلتك وللا خلعتك بالقوه كده زى ما انا عاوزه هتسيب علامه .... وهابقى باقطع حته منى ؟ .... ومش هاعرف ولا هاقدر اداريها ...هتسيب علامه بالدم وانا جتتى مش ناقصه علامات خلاص ما بقى فى ....!!
تعرف يعنى ايه تعجز وصوتك يتخنق وكلامك يموت جواك وعقلك يراجعك مليون مره قبل ما تنطق او تتصرف ويقولك اسكت احسن لك.؟
تعرف انت ايه عن ان نفسى مره واحده بس اقول وحشتنى ؟
تعرف انت ايه عن انى بابقى محتاجه اسمع صوتك بس صوتك واتخرس وتضيق على الدنيا وتهون ...وما اعرف اتصرف ولا انطق حتى بكلمه واحده ؟
طيب اهدى بس ....انا مش عارف طيب اعمل لك ايه علشان تهدى شويه
نفسى اعرف بتتكلم ليه؟ ....هو ما فيه مره تبطل فيها تعليقاتك دى ...انا قلت لك اسكت ...سيبنى بقى فى اللى انا فيه ....انت مالك ان كنت باعيط وللا روحى بتطلع حتى ؟...تعرف ايه انت عنى اصلا علشان تتكلم ؟
تعرف انت ايه عن واحده بتموت عقلها وجسمها فى اى حاجه اى شغل علشان تتلهى عن حياتها وتبقى امنيتها بس انها تنام زى بقيه خلق الله ...سنين ولا تعرف النوم ده عامل ازاى... كل ساعه تصحى مفزوعه من نومها ، نفسها تحط راسها على كتف وتنام بجد ، و تنضغط وما تلاقى غير انهاse masturbe كل ليله ، مش شهوه ...لا ... وجع وزهق وقله حيله ،يعنى بدل حبايه المنوم وسيله... تخيل حتى ده بقى وسيله تخليها تغمض شويه ، وبعدها تحط ركبها وراسها فى صدرها وتدفنهم وتفضل تعيط بحرقه .. لحد ما يهدها التعب وتاخد حلمها فى حضنها علشان بيطمنها وتنام!
الاول كان اخر الليل فى الضلمه ...لوحدها ....وحبه حبه و بالراحه خالص اتنقل من الجسم والسرير للايام كلها.....للعيشه. ..
تصور انت بقى اما الحياه تبقى كلها masturbation !
تعرف يعنى ايه الايام تتعاش كده ...؟
بقت تحلم به وله ومعاه.... مع نفسها ..
تسمع اغانى له ولها مع نفسها ..تشترى هدايا و كروت لكل مناسبه له ولها مع نفسها...ولا حد يدرى عنهم غيرها....متكومين فى أدراجها
تتكلم وتقول له ويرد عليها .... تلبس له وتختار هدومها وهدومه ...تفرح بيه ومعاه... مع نفسها...تضحك وتعيط .....تدى له وتاخد منه ... تتخانق وتتصالح وتزعل وترضى ... تاكل وتشرب وتنام وتقوم وتخرج وتروح وتييجى معاه برضه...مع نفسها ....
دنيا بحالها ...عيشه ....فاهم يعنى ايه عيشه ؟...عيشه بتبسطها اوى ...
"يا سلام ...ده انا اهه ...زى بقيه مخاليق ربنا ...والدنيا حلوه....ولها طعم "
وتتف على نفسها لما تفوق ثانيه واحده بس ...وتكره الساعه اللى اتولدت فيها ....وتلعن ابو الوحده ....والمرار اللى خلاها تعيش كده بتستطعم وتتلذ وتدوق ...مع نفسها!
تعرف يعنى ايه تكبر و تمر سنينك وتشيخ من جوه قبل بره .. وتبقى عايش مع الوهم وبتعتبره شريك ..وما يبقاش فيه آآآآآآآآآآآآآآآخر غير جواك وبس؟
تعرف يعنى ايه تصعب عليك روحك ويبقى نفسك تمد ايدك جوه نفسك تطبطب عليها ومش عارف...... و تقعد تقول لها معلش ...ولا يهمك بكره احسن ...بكره هتتعدل ...بكره يمكن ييجى ...وان ما حصل تانى تمنيها وتصبرها... والعمر بيمر... وبكره مش بييجى
تعرف انت ايه عن الواحد لما يشوف عقله بيدوب قدامه حته حته وهو شايف ده وعارفه ومش قادر لا يبطل ولا يرحم روحه...ويتحرق من جوه ..يجمد ...يتحجر...يبقى صنم ..منظر وبس ...يبقى حاجه ...مش حد؟
انا طهقت من العيشه دى اوى ...زادت عن حدها ... خرجت عن حدود الحلم والامنيات وكل الكلام الظريف اللى بنصبر بيه نفسنا على وحدتنا وقرفنا وخنقتنا ..بقى جنون...جنون
اما تبتسم فجأه لحد مش موجود لمجرد انك افتكرت كلمه من كلامه وما تفرق ان كنت بين الناس وللا لوحدك ،لما تعيش مع طيف وتشوفه وتسمع صوته اللى بتشتهيه ...ده ايه؟
تقدر تقوللى ده اسمه ايه؟
ياترى تعرف تحس باحساس ست منتهى املها ان السلام بالايد يطول حبه او انها من كتر ماهى متاكده من ان اللى جواها لا هيتشاف ولا هيلاقى رد ومش نافع يبقى حقيقى مالهوش مكان ... تقعد تستنى اى كلام تصطاده وتقول انه لها ..مع انها مش صغيره علشان تستنى ده ...؟
وتبص على نفسها وتتكسف منها ،وياريت نفسها دى بتعمل اللى يخليها تتكسف منها بجد ، الا يا حرام ملهوفه على انها تبقى زى الناس.... نفسها تدفى من جوه ....البرد اكلها خلاص
نفسها حد يقلق عليها لما تمرض...حد يستناها .. يشتاق لها ،حد يقول لها كنتى فين...؟ حياتى كانت فاضيه من غيرك .. نفسها تتحضن ، حضن اطمنى مش هاسيبك حضن يخبيها ويغطيها ، حضن تعالى ارتاحى بقى ...انا معاكى ما تخافى انا جنبك .... حضن برضه ما بييجى الا فى الاحلام ....
تعرف انت ايه عن اللى جوايا ؟ تعرف ايه عن فرحتى اما باحس بيك وانت جاى من بعيد ..وقلبى يفز جوايا من صوت دبه رجلك حتى قبل ما اشوفك ،تعرف انت ايه عن صوتك اللى اما اسمعه يغير يومى كله واعيش عليه ايام
تعرف ايه انت عن انى مستنياك وقابلاك ؟فاهم يعنى ايه قابلاك زى ما انت كده ..؟
شيله على بعضك ....واهو زى ما تطلع بقى ...
بوحاشتك قبل الحلو اللى فيك بجمودك ووشك اللى ما باعرفش اقراه بكلامك اللى بيعلم فى ، بقسوتك اللى عارفه هى مره ازاى وحنيتك اللى نفسى اشوفها ويمكن ساعات باحسها ،بحدتك ووقاحتك وكسوفك اللى شفته اكتر من مره ،بصوتك القاطع : ابعدى ،وبدلعك وانت بتقول : انتى عارفه انى مهتم ،بكلامك لما يفلت منك غصب عنك وتحلى بيه دنيتى ولما تفرمل وتسود عيشتى ، بلمعان عينيك من الفرحه وبتعبك واما يبقى مستحيل انك تدى اى حاجه وانت مرهق ،باحلامك وطموحك ، بطفولتك وانت بتضحك ضحكتك الرايقه وبلؤمك لما تبص لى وفاكرنى مش شايفاك ،بحبك ساعات للحياه كلها ،وبرضه الزهق منها
عاجبنى ... بكرهك الجامد اوى اما تكره حد وحبك القوى اما تحب بجد ...باحتياجك يمكن ساعات زييى لايد تطبطب وتشيل عنك حبه بحد يحسك ويقدرك عشانك انت ...عشان البنى ادم... مش عشان ادوارك فى الحياه ،بلهفتك وانك يمكن برضه بتتمنى زى ما انا باتمنى ان حد يقبلك بعيوبك بصوتك العالى ونرفزتك وفلتان اعصابك وسكوتك المميت ....
تلاقى حد يعوزك زى ما انت كده لا يقص ولا يلزق فيك ولا يبقى عاوز يعدلك او ينحتك على مزاجه…
انا ما بقاش يهمنى اذا كنت هتيجى ولا عمرى ما هاقابلك .. ولا بقت تفرق هتشوفنى ازاى وللا حتى تعرف ولا ما تعرف....
طز ...اهو هو ده اللى جوايا وهو ده اللى انا حاساه قول بقى مراهقه ... مجنونه...محرومه ... اى زفت ...انت حر ...
ومهما ان انا حاولت وعافرت ما اظنش انى هابطل استناك واسمعك واشوفك ولا هابطل اقول يمكن ...ولا اى حاجه من الكلام الفارغ اللى باقنع روحى بيه ده لانها طولت معايا اوى اوى ، ولو اسبرينه وللا مسكن يبقى حرام لازم اخف بقى
انا تعبانه والله انت ما تعرف انا تعبانه ازاى....هتعرف ازاى بس؟ انت عمرك ما هتعرف كلامى ده بيوجعنى ازاى ، لانه انت مش انا... لاانت بتشوف بعيونى ولا بتحس باحساسى ...انا اللى قلته لك ده حته صغيره اوى اوى من اللى جوايا ..
وبتقوللى عارف ...عارف ايه بس؟
تعرف انت ايه عن انى بابتسم دلوقت ...عشان انت قدامى شايفاك ...شايفه ابتسامتك ووشك وعينيك ، شايفاك ....
تعرف انت ده ...؟
انت لو وصلك اللى جوايا ده يمكن ما تتحمله ولا تقدر تعيش بيه وتتعجب ازاى انا ساكته وماسكه نفسى وشايله الحمل التقيل ده لوحدى ..... وعادى ..مكمله وعايشه وباروح واجى ، مش ممكن تصدق ان فيه واحده ممكن يبقى لك جواها كل ده ورغم وجعه وتقله الا انها برضه لسه مستنيه وفيه جواها حته منوره بتقول:
بُكره ...يمكن ..!!
تصدق بايه انا باموت وانت برضه ماتعرف ...هتعرف منين بس؟
أخاف واتدارى ...وعلى طول باهرب
وجوايا انا عارفه انا باهرب ليه
انا زهقانه ....خلاص تعبانه
نفسى فى حقى ....ولومت عليه
الا بالحق …هو انت هتيجى امتى ؟
انا دماغى هتنفجر ..
انهت قراءه جميع اوراقها ،احتضنت وسادتها ونزلت دمعه ساخنه حفرت مكانها....
اطفأت النور وغطت وجهها بغطاء سميك لتتحصن به من نفسها من قلبها وعقلها ..... من العالم كله....
لم يدق ابدا جرس هاتفها .... فالحراره مقطوعه ....منذ زمن ، زمن بعيد.... الحراره مقطوعه عن عالمها كله...
لم يكن له اى اسم ...لم تلمسها اى يد الا يدها ..لم تسمع الا صوتها.... لم يشاركها اى انسان اى شىء ،لم ينتظرها او يفتقدها مخلوق ...
الفت هى جميع السيناريوهات ...عاشت كل القصص
بكت وضحكت ... تمنت وياست ... احبت وكرهت ..عاشت الرجل والمرأه الطفله والعجوز ...
هى...هى فقط كل الادوار...
ممثل اوحد يعيش كل الحكايا... يبدل الاصوات...الحوارات...الاسماء ، ويتلون
تتلبسها ارواح كثيره تغيرها وتتركها بقايا انسان ولا يبقى ثابتا فيها الا كلمه واحده تبدأ بها طقسها اليومى ...كعنوان لوجودهاو حياتها واحاسيسها ....دوما لا تنسى ان تقول:
إليه وحده......
لم يكن هناك ابدا آخر ....فالمسرح خال ،لا جمهور ،ولا ديالوج، انما فقط عزف منفرد ..........
ومونولوج
تمت
|